محتاج لها

محتاج لها .. تروي حياتي بهمسها

هيَّ الحياه .. بالنِّسبه لي

بحلوها وبمرَّها .. محتاج لها

لاشفتها .. قلبي خفق .. وعمري نطق

ردَّدت .. بنشوى إسمها ..

وآخذني فوق .. هذا الَّلي خذته مِنَّها

أمشي بشوق .. وأحكي بشوق ..

وأسكت ... بشوق

دايم أخايل رسمها ..

هيَّ الحياه .. بالنِّسبه لي

بحلوها وبمرَّها .. محتاج لها

محتاج لها .. تقول ياعمري .. تعال

وتاخذني في جنح الخيال ..

وأطير .. مِن فرحتي أطير

يادنيتي .. أطير

ما أبغى شي .. كافي علَّي

كِلمة أحبِّك .. بالعدال

هيَّ الحياه .. بالنِّسبه لي

بحلوها وبمرَّها .. محتاج لها

تاريخ: 1986

كلمات: بدر بورسلي

الحان: عبدالرب ادريس

دخلت عليه الغرفة وصوت محمد عبده يتغنى بهذه الكلمات ..بحلوها ..بمرها ..محتاج لها ..وإلا هو ينفخ دخان سيجارته وآآآه تطلع من اقصى القلب ... وانا اتأمل ملامح ويه واللمعة الي بعيونه ولا حس او شعر بدخولي عليه .... فتنحنحت ..احم ..احم.. نحن هنا وانا اضحك بويه واقووله : بيييه من وين طلعت هالاغنية ؟؟؟ رديتنا خمس وعشرين سنه وراه ....ردعلي وقال: لقيت الشريط الكاسيت مع اشرطة الكاسيت الي امجمعتهم انتي وحاطتهم بالكبت .....من ايام الجامعة، ضحكت وسرحت اشوي وفجأة سألته : مني اهي الي  بحلوها ...وبمرها محتاج لها ؟؟؟
 وإلي خلتك اتقوول الآه من اقصى القلب ؟؟؟ انخطف لونه وكأني عزفت على الوتر الحزين من أوتار قلبه .
...طالعني بنظره تحوى الكثير من الاحاسيس ..حنين ...شوق... حزن....حب فاقده ما شعر فيه الا معاها ...  الفراق صعب ..
رد علي والدمعه محبوسه داخل اعيونه.... اتسوين نفسج ما تدرين اهي وحده ما كو غيرها !!!!!
قلت له :الله ... عقب كل هالاسنين وللحين تحبها ؟؟؟؟
رد علي وقال : ولا راحت من بالي لحظة !! 
قلت له : ليش طلقتها دامك اتحبها كل هالحب ؟؟ 
قال لي : انت وقتها كنتي توج اصغيره  ، ومجتمعنا في ذاك الوقت مو مثل الحين انت  ما تذكرين  اشلون اهلي  كانوا رافضينها.
قلت له : صح بس انت ريال ، كان المفروض  اتصر على موقفك وما اتنازل عن حبك .
قال لي : لو استمريت معاها بتعذب , لا  الي اقدر اعيش معاها بعزله عن اهلي ، ولا راح اهلي  ايتقبلونها بينا   ولا ابي باجر اعيالي ايصيرون منبوذين بسبب امهم !!! كان اصعب قرار بحياتي..آآآه
قلت له : ايييه اذكر يوم طحت مريض فتره بعد طلاقكم ....بس
قال لي:بس شنو ؟؟؟ واهو يشعل سيجارته الثانية بل ..... الثالثه ؟!!
قلت له : انت تزوجت عقبها صج عقب ما اهي اتزوجت !! هل معنى هذا انك ما حبيت زوجتك الثانية ؟؟؟
قال لي : لا حبيت الثانية ...بس حبي للاولى كان غير.. حب من نوع اخر ...

قلت له اعذرني على جرأتي وفضولي بنفس الوقت وانا يلف برأسي الف سؤال وسؤال ؟؟ 
...جان ايتعدل بقعدته واهو يبتسم ويقوول: يا ويله ...الي ايطيح بأيدج  اتطلعين ملفاته كلها ....هاهاها  قولي  هاتي الي عندج بس صبيلي استكانة جاي ...
ضحكت وانا اصب الجاي له واقووله : قوول الصج ..الصج ؟ وار فع عيوني  واطالع بعيونه واسأله فجأة ؟؟ انت شايفها من قريب ؟؟
بقق اعيونه واهو مستغرب !!! واهو ايقولي:  ها ...يا الابليسه اشدراج ؟؟
قلت له :  ما يبيلها ذكاء ...واضح عليك ان في شيء حرك حنينك المخشوش داخل قلبك ،
وكنت تعتقد انك نسيت واكتشفت انك ...تناسيت وما نسيت . ...
رد علي وقال :  ايييه شفتها قبل جم يوم بالجمعية وكان معاها اعيالها ... يا يحليلهم .. ويسرح اشوي  تدرين ...كانوا ممكن ايكونون اعيالي ...

انا اخنقتني العبره لما سمعت كلامه...
حاولت اخفف عنه واقووله:ارحم  قلبك ... الي يحب انسان حب خالص يتمني له السعاده وين ما كان حتى لو ما كان لك نصيب وياه ...
رد علي  واهو ايكمل كلامه كأنه ما سمع كلامي وقال : لما شفتها رحت سلمت عليها وسألتها عن احوالها  ، فردت على وقالت لي: الحمدلله انها بخير. بس تدرين شفت بعيونها كلام غير الي انقال ؟ وبسرعه انا غيرت الموضوع و سألتها اهذول اعيالج ؟ ردت علي وقالت ؟ اييه  هذا جاسم وهذا خالد وهذا فهد ....

شهقت وقلت له : شنو امسميه ولدها عليك !!!؟؟؟
هزلي راسه بالايجاب وكان يمسح بطرف ايده دمعه انزلت من عينه ....

سألته : لو رد الزمن لورى مره ثانية شنو راح اتسوى  منو راح تختار ؟ حبك او أهلى والمجتمع ؟
رد علي والحيرة واضحة على ويه : اقوول سؤالج كونه صعب ايصيير فماراح افكر فيه لانه ما ييب الا عوار القلب .
طبعا عورني قلبي عليه ، فقلت له : الله ايوفجها ... دايم اطلب الله ان يسعدها وان يمسح على قلبك ...


قال : وانا طالع بأيدي شيء غير جذيه ؟؟ الله كريم ... راحت أبطريجها الله ايوفجها .
طلعت من غرفته والألم يعصر قلبي وانا اكلم نفسي وأقوول مرات الانسان يظلم نفسه يعيش حسب الناس ما تبي مو مثل اهو ما يبي ..مظلوم الحب بحكم التقاليد والاعراف.
دمتم احبتي بأطيب حال .....