اليوم بقولكم سالفة من سوالف عيارة الحريم ويورهم ... لا تستانسون يا الريياييل هم انتو لكم حركات ما اتبطلون من سوالفكم !!!!
في العاده اثناء فترة الدوام لا بد ايكون في تجمع لنا على استكانة جاي او فنجان قهوه وطبعا لازم وياه نوع يديد من الحلو الي يبتكرونه بناتناوحاطين اعلاناتهم على الفيس بوك ...
طبعا تجمع نسائي هذا يعني في الغالب حش وقراض :)))
بس للامانة ولله الحمد ما انييب بسيرة احد ولا نسمح لاي وحده فينا اتكلم بأعراض الناس .... يا انسكتها ... او انغير مجرى الحديث...
احنا حشنا وقراضنا من نوع اخر , يعني لما ابي اشيشهم ابي اعرف رايهم بشغله ، ادربح لهم على البراد سؤال اخلي كل وحده فيهم تدلوا بدلوها واتطلع إلي عندها كله واقعد اسمع وافسر ردود افعالهم ...
فكان ذاك اليوم يايه زميلتي بالشغل والويه معفوس والبووز طول شبر, فسألتها اشفيج عسى ما شر مو عوايدج ضاربه بوز والمود تحت خط الصفر؟؟؟؟؟؟
ردت علي وقالت : زعلانه مع ريلي صارلي جم يوم ولاني قادره اراضيه واهو للحين ما راضاني؟؟؟" ملحوضه زميلتنا حديثة العهد بالزواج صار لها بس سنتين"
فقلت لها صبري اشوي بعد ما نقعد مع البنات اليوم وانخلص من سوالفهم
راح انتناقش انا وياج ابروحنا وراح اتحلين مشكلتج ؟؟؟ بس انتبهي للحوار الي راح ايدور اليوم فتحي اذونج عدل وسمعيهم شيقولون !!!
صار وقت جاي الضحى وتيمعنا بمكتب احدى الزميلات وصبينا جاينا ونكته من هذه وموقف مضحك مع اعيال ذيج ...وبدأنا القرقره .... تميت اشوي وانا راسمه على ويهي تعبير الكدر وضيقة الخلق !!! جان اقوولهم يا ينات أبي اخذ رايكم بموضوع ؟ طبعا الكل سكت وبطلوا اعيونهم عدل والتفتوا صوبي واهم ايقوولون خير فيج شيء؟؟
قلت لهم : اييه ابي اعرف ليش كله الرياييل يتهمون الحريم بضرب البووز وايحبوون الزعل واهم اكثر منا ايتزعلون ويطنقر ولا يرد عليج ؟؟
ودي اعرف منكم لي تزاعلتوا مع رياييلكم ؟ جم يوم ممكن اتضلين زعلانه ؟ ومنو منكم الي بيدي بالصلح ؟ (طبعا قطيت السؤال وانا راسمه على ويهي ابتسامه العياره واخزهم وحده وحده عشان اعرف شنو راح ايخشون وشنو الي راح ايقولونه )
طبعا قلت لهم راح نبدي من اليمين وانا راح اكون اخر وحده فيكم لاني ابي اسمع منكم اول.....
فقالت الاولي : انا لي زعلت مع ريلي اطنقر عليه ولا القيه ويه بالمره واذا حصل كل الوقت اكون ببيت اهلي وما ارد الا وقت النوم واخليه يطحس لما يحس بقيمتي واهو يي ايراضيني ... وبعد لما ايراضيني ما ارضى بسرعه ..
سألت الاولى : يعنى ممكن اتطولين بمدة الزعل وياه ؟؟؟
فردت علي : اييه ممكن اظل شهر.
قالت الثانية : واااي ما اقدرعلى زعله بالمره بالمره جان امووت لو ما ايحاجيني اظل اتناجر وياه واكلمه ليما نخلص من الموضوع بحزتها ما اعرف انام وانا زعلانه او اهو زعلان مني.
فعلقت عليها : يعنى انت امصفيه احسابج اول بأول ما اتخلين شيء !! بس مرات الواحد ايكوون امعصب ما ايقدر ايتفاهم وممكن يغلط بالكلام واتخاذ القرار المناسب .
فردت علي : ما ادري انا وياه تعودنا على الطريقة ...
قالت الثالثة : كلش هميته زعلت أو رضيت ؟ الامر عنده سيان ونفس الشي أنا ما يهمني زعله او رضاه !!!!
فقلت لها : يعني حياتكم "لا حرب لا سلم " فهزت لي برأسها بالايجاب!!!
قالت الرابعة : انا اذا زعلت وياه شلت قشي واعيالي ورحت بيت اهلي ؟؟!!!
فسألتها : على كل سالفه اصغيره او جبيره اتروحين بيت اهلج ؟؟؟ واهلج راضين على تصرفج هذا ؟وجم يوم تقعدين عندهم ؟ واعيالج شنو وضعهم ؟
فردت علي: عادي اهلى تعودوا، واطول مده قعدتها ببيت اهلى كانت اسبوع وايي ايراضي, واعيالي تعودوا على هالوضع .
قالت الخامسة : انا ما أحب الصيحة واللوية بس الله عطاني ريال جنه شايب ، كله ايحن وحار امصرقع , ما يقعد راحه لازم ايحوس بشغله والا اذا فضى يقعد يتناجر وياي ..يعني نقعد ثلاث الي اربع ايام فى حب وهنا وفجأه تلقينه قلب فوق تحت واختلقه سالفه اتناجر ويتهاوش عليها وايي انا اراضيه ....
والي ايضحك بالسالفه اول زواجنا كنت ازعل واتضايق من اسلوبه ومع العشرة اكتشفت شغله اتضحك انه ايحب الدلال والدلع ما بعد الرضا والصلح وان اخناقه كله اكشن يضيفه على الحياة ...
فقلت لها : ريلج يبي اهتمامج ودايم ايشغل تفكيرج ... بس هم اسلووب حلو ما اتكون الحياة على وتيره وحده.
والحين يه دوري فكلهم امركزين نظرهم علي بيسمعوني اشبقوول؟؟؟؟
قلت لهم انا وياه من بداية زواجنا حطينا قواعد مهمه بالتعامل بينا:
اولا : المشكلة ما تطلع خارج غرفة النوم يعني " يعني لا اهلنا يدرون عنها ولا ايحسون فيها"
يعني لو صيحتنا واصله لوين , بس نطلع جدام الاهل بالزواره والعيال احنا سمن على عسل وله الحشيمه والكرامة واهو يبادلني نفس الشيء.
ثانيا : انا بطبعي ما احب الزعل ولا اتحمل التطنقر وامووت من الحقران ، فتلاقيني احاول امشي الموضوع عادي واحاجيه جنه ماكو شيء واذا كان الموضوع جايد وانا غلطانه عادي" اعتذر
واراضيه .. بتقولون جذيه يتعود على انج دايم اتراضينه ؟؟؟اقوولكم يمكن بالبداية صح بس بعدين اهو تقبل الامر وصار يعترف بغلطته ويعتذر صج مو وايد بس افضل من اول .
ثالثا : مدة الزعل ما اتطول اكثر من ثلاث ايام حسب ما امرنا دينا وحث عليه رسولنا صلى الله عليه وسلم "لا يحل لمسلم ان يهجر اخاه فوق ثلاث فيلتقيان فيعرض هذا ويعرض هذا وخيرهما من يبدأ بالسلام " هذا وصانا بالصديق والصاحب فأشلون اذا كان زوجج فهو اولى بأن تلينين معه.
وفى اول زواجي كنت حاده ابي احل المشكله بوقتها مافيني صبر فلقيت ان هذا ايزيد الخناق وتعلى الاصوات اكثر، فتعلمت شغله وايد مهمة لما ايكوون الريال امعصب لا اتناقشينه ولا اتردين عليه التزمي الصمت لما يهدى وعطيه فرصة يقعد بروحه يفكر ويهدى وبعدين كلميه . لأنج اذا ناقشتيه واهو متضايق ومعصب راح يطلع من طوره واتطلعين اسوء ما فيه من طباع وممكن يغلط عليج فلا تحطين نفسج بهالموقف والاهم من هذا كله كلامج كله احترام يعني لا تغلطين عليه ولا تسبين هذه صفات مذمومه بالريال فما بالج انت الانثى لازم اتكونين راقيه باسلوبج .
رابعا : زعلج شيء وقيامج بواجباتج الزوجية شيء ثاني لا تخلطين الامور اهو له حق وانت عليج واجب، ولا تنسين حقه الي الله افرضه عليج يعني راعي ربج بريلج.
بعدين يا سيدات يا فاضلات... داخل كل رجل طفل صغير يحتاج الي حبج وحنانج فدلعيه خليه ايحس بغلاه وحبج له انتي الكسبانه اذا ما تدلع عليج من بتدلع عليه والا تبون باجر ايدورله وحده اتدلعه....
بعدين اذا حاسة ان كلمة "انا اسفه " صعبه عليج اتقوولينها ترى في اكثر من طريقة اتراضينه فيها :اذا ابطيني ويحب الاكل طبخيله الاكله الي ايحبها واكليه بايدج بعد :))
اذا اهو ازقرتي وايحب التكشخ حطي بخزانته هدية عطر ، واذا اهو رومانسي ويفهم بلغة الورد حطي على مخدته ورده حمره مع كرت كتبيله فيه عبارة حب واعتذار, كلش كلش دزيله واهو بالدوام مسج عبري فيه عن حبج واعتذري .
ردت على وحدة من الزميلات وقالت ويي اعرف وحده من اهلنا كل ما ازعلت ما ترضي الا بجاهه" المقصود هدية قيمه او ذهب " فقلت يا جماعه التزامات الحياة صارت فوق طاقة رب الاسره ان يلبيها لازم انغير فكر بناتنا يعني الي عنده وايقدر لا يبخل على اهله بس الي ما عنده لا اتحملينه فوق طاقته ولا اتطالعين فلانه وعلانه ..مالكم شغل بالظاهر يعطيها هدايا غالية وداخل نفسه يمكن يلعن الساعه الي خذاها فيها ...
ردت علي الثانية وقالت : جنج انتي صافه ويه الرياييل علينا وطلعتينا احنا الغلطانين...جان اضحك واقولها لا يا الغالية : الريال حتى لو اهو غلطان ما اتعاسرينه
تبينه يعترف بغلطته شيميه انتي هيأي الدرب له صدقيني راح اتلاقينه يستجيب وهذول هم الغالبية .
طبعا انا ما اعمم على الكل لان في بعض الرجال صعب المراس عنيد ويحتاج وقت طويل حتى يتغير والله ايعينها الي ايكوون ريلها من هالنوع.
خلصت كلامي جان اطق على الطاولة ثلاث طقات واقولهم يلا انتهت حصة اليوم كل وحده على مكتبها واتشوف شغلها قاموا يضحكوون..
سحبت زميلتي الي كانت الصبح زعلانه وسألتها ؟ اشرايج ؟ سمعتي منهم ؟
الحين فكري بالكلام الي قلناه وقلبيه برأسج وانت حطي اسلوبج بحياتج مع زوجج
بس ها انتبهي تري كل طريقة ولها سلبياتها وتأثير على العيال ونفسياتهم وعلى ريلج بالدرجة الاولى،ما عدا الطريقة الي اتراعين فيها ربج ... وان شاء الله ربي يصلح ما بينكم و يهدي سركم ...فابتسمت وقالت ان شاء الله ما راح ايصير الا الخير.
وكلامي اهنيه للرياييل شنو فيها لو لنت لزوجتك واعتذرت لها هذا ما ينتقص من رجولتك شيء بالعكس المره السنعه اتقدر شنو يعني اعتذار الرجل وتكبر بعينها وتشعرها ان لها خاطر عندك ،يعني مو كل مره اهي تعتذر "يعني خل اشويه عليها واشوي عليك "
وهم انتوا خفو على حريمكم مو كل سالفه اتسويها قصه وبطلوا اتعقدون النونه واتنفخون بالسجاير ولا متحملين انفسكم من العصبية!!!
تلقون الريال بالدوانية ايتضحك ويسولف ويتغشمر واذا دش البيت عافس الويه جنه شام ريحه خايسه عزكم الله ؟؟؟؟
بس ابي اذكرهم بقول الرسول صلى الله عليه وسلم " رفقا بالقوارير"
دمتم احبتي بأطيب حال ...طبعا اختياراتي من الاغاني اتناسب الشيب والشباب:))
