كنت اتمنى لو بأمكاني ان اوقف الاحداث من حولى كما اوقف شريط الفيلم بضغطت زر او اعيده من الاول وارد العطلة الصيفية من الأول .
من صباح يوم السبت وانا مشتطه وانا أتاكد من ملابس العيال أجهزمرايل البنات وبنطرون الولد,والخادمة اتساعفني اوصييها على القمصان البيضاء كل واحد مقاسه صح.
عند الظهيره......
صحوا العيال والويوه متخربطه من النوم وبخاطرهم ايتنطعوون بنومتهم حتي اخر لحظة ،لانهم من باجر راح يكون موعدهم مع جرس المدرسة .
فقلت لهم يلا غسلوا وصلوا عبال ما انحط الغدا ،طبعا المزاج منعفس حده الواحد فيهم يا الله ايشيل نفسه , اجتمعنا على الغدا وكل واحد يقترح وين تكوون طلعتهم الاخيره واتفقوا طبعا على الافنيو كالعاده ...
عند العصر...
الكل ايجهز نفسه للطلعه .
.
ومازال الاستعداد للطلعه مستمرا
.
وما زال الاستعداد مستمرا .....
وقت المغرب ...
اخيرا ... طلعنا
وكان الاتفاق نرجع البيت مبجر عشان يمديهم ايتزهبوون للنوم امبجر .....
طبعا ما اتصدقوون انها املغ طلعه طلعتها مع اعيالي لان كل واحد فيهم يبي شيء يختم عطلته حسب مزاجه وانا مو قادره الحق على الي يبوونه , فقلت احسن شي اريح بالي وابرد اعصابي واخلى الامور تمشي حسب ما تيي وراح ايكتشفوون اهم انهم لو ما نظمو ا نفسهم واتفقوا مع بعض ما راح ايحصلون على الي يبوونه ....وفعلا تركت الامور تاخذ مجراها طبعا لما حسوا ان الوقت ادركهم وجاء موعد العودة الي المنزل واهنيه يت الصجية ..كل واحد فيهم ايقوول......
.يمه ماسويت هذا؟؟؟ يمه ماشريت ذاك؟؟ يمه نسيت احط ذاك؟؟؟ وطبعا مراعاة لحالة الاستعسار الي فيهم ...تساهلت وياهم ومديت وقت العودة للبيت اشوي وانا داريه انها بتطلع على راسي ..بس شسوي كاسرين خاطري.
العودة للمنزل...
طبعا تعشوا بره...واحنا بالسياره تسمع قرقتهم و تحلطمهم, كل واحد يسترجع ذكريات اول يوم دراسي وتوقعاته منو راح ايكون بصفه من زملاء العام السابق واخذ من هالحجي الي يصك الراس وانا احلم بلحظة دخوولهم فرشهم علشان انعم ببعض الراحة والهدوء واختلى بنفسي ..
طبعا اول ما دخلنا البيت ,وصيتهم يجهزون حالهم للنوم بأسرع وقت ...
جان اقولهم كل واحد فيكم يجهز "عزكم الله " جوتيه وادلاغه وصفوهم بالصاله وكل واحد يحط جنطته الفاضية يم اغراضه عشان ايحط كتبه اليديده الي راح ايستلمها باجر اوووف طري على بالي باجر تجليد الكتب الله ايعيين"اكره ما علي دبق الجلاد اللاصق على اصابع ايدي"
وانا فى هاللويه ياني بي.بي.ام ظريف ضحكني يقوول
"أعزائي باقي ساعات وتخلص عطلتــــــــــكم ,يرجـــــي الاتجاه الي سرائــــــــــــركم دون مـــــــــــد بـــــــــــراطــــــمكــــــم"
طبعا منو كان ايحوس وراي وايحن "طبعا ماكو غيره ولدي الاصغير وهو بثانية روضه صارله يومين حايشته حساسية ومستاذي من خشمه وايقوول"انا مريض مابي اروح المدرسه" طبعا هالجمله كنت اسمعها من صحى من النوم حتى جاء موعد النوم وانا اعطيه دواه واهو ايقوول "باجر ما راح ارووح المدرسه" وانا اقووله انت الحين نام ولما تقووم راح تكوون زين مافيك شي باذن الله .
موعد النوم ....
دخلتهم اول شي لغرفهم وقلت لهم يلا ناموا ..... وتركتهم نص ساعه وانا اسمع صيحتهم واهم بالغرفة وكل اشوي اقوول لهم يلا ناموا ...الي ايقولي ابي اشرب ماي ...والي ايقوول كرمكم الله بروح الحمام وانا اقووله يلا رد افراشك.....واخيرا ادخلوا فرشهم.
فبدا البيت يخيم علي بعض الهدوء ..
وفجاة ....
بي.بي.ام يديد بس هالمره من بنتي الي منسدحه بفراشها واتدز برودكاستات والا شنو اتقوول فيه
" يااااااا رب...../O\..... اول حصة احتياط. "
وانا فاطسه عليها من الضحك اقوول اذا من اولها جذيه لا عز الله كدينا خير"
....واخــــــــــــــــــــــــــــــــــيرا هدووووووووووووووووووووء
.
.
وفجأه
بدأت "ليان " ذات الشهر ونص بالصياح قلت لنفسي
"نووووو بليز ابي ارتاح اشوي "
والحمدلله ردت نامت بس كانت تتململ بفراشها فقاطعتني وانا اكتب هالبوست اكثر من مره .
وعدى اليوم الاخير من العطله وانا اقوول داخل نفسي "اشوه ما عندي مدرسه باجر "واكثر شي اكره فى اول يوم مدرسه اهو عوار البطن الي ايحووشك من الصبح من الخرعه "
استـــــعدوا لتجـــــلـــيد الكـــــــتب
دمتم بأطيب حال احبائي
هناك ٦ تعليقات:
كل عام وأنتم بخير بالعام الدراسي الجديد
:)
باكر يتنظم وقتك ويصير عندك وقت لنفسك ولليان :)
اخيتي العزيزه Nikon8
وانت بخير وصحة وسلامه,ايام العطلة انحن عليهم على مواعيد الطلعة ولازم ايتزهبون امبجر والخ..الخ. اما الحين راح انبطل هالاسطوانه وانطلع السي دي اليديد الي ايقوول"درسوا.. جابلوا.. كتبكم.. لا تنسون اغراض الرسم.
:))
ربي يسمع منج وايصير عندي وقت لنفسي ولليونه المزيونه.
شرفتيني بمرورج واسعدني تواجدك يا الغاليه.
لا تقاطعين ؛)
اللللللللله بوست يديد
اخيرا
صايره بخيله علينا بالبوستات .. واضح ان ليان ماخذه كل وقتج
الله يخليكم حق بعض
كل عام و انتي و العيال بخير و صحه و عافيه يا رب
والله صرنا احنا باك تو سكول مو بس هم
مادري متى نرتاح
تحياتي
:)
اذكر في احد المدارس الثانوية قام طالب بكتابة اغنية عدنية مشهورة بدايتها
عدنا وعاد اللقاء
وعاد ليا الامل
طبعا الطالب كتبها عاد ليا الملل
الله يعينكم يا اولياء الامور وانا كنت ناوي اكتب بوست عن معاناتي وياكم الصبح وانا في طريقي للعمل وطريقة قيادتكم للسياره بس ما كملته قلت بدور فينه الدنيا ونصير منهم
كل عام وانتم وابنائكم بخير
وامنيات بالتوفيق الدائم.
بليز شيلي تأكيد الكلمة <-- اتشائم منها
عزيزي دكتورreemas
لاياخوي ماني بخيله بس مثل ما قلت "ليونه" ماخذه كل وقتي ...مرات عندى خواطر وافكار ابي اكتبها ما عندي وقت فتلقاني اسجلها كرؤوس اقلام علشان ماانساها والخير ياي ان شاء الله.
وربي يجعله علينا وعليكم وعلى كل اولياء الامور عام خفيف لطيف دون صداع وارتفاعات وانخفاضات بضغط الدم وحرقة الاعصاب :)))
تحياتي للاسره الكريمه وخصوصا اخر العنقود "طيوبه" اشلونها مع اولى ابتدائي ؟؟
دمت بأطيب حال
عزيزي الفاضل [ESTaa7]اندلسي
اشوه انك ما تشمت يا عقرباووي فينا لا تنسى ترى حوبة العقربة جايده:))
تدري انك ذكرتني بسالفة هالطالب بسالفة صارت جدامي كنت رايحه مع اخوي انشوف نتيجته بالثانويه العامه وهذي الحادثة قبل بسنه من ما يحولون هالثانويه الشهيره لنظام المقررات والا طلع طالب من باب الثانويه طاير من الفرحه انه ناجح وكان صافط سيارته على الرصيف يم باب المدرسه فقام على اوله سحب العود من الباب الوراني وتربع فوق الدبه واحتضن عووده وبدي يعزف ويغني ...غناء ..طب بالناظر ...والوكيل ...والمدرسين ليما ابردت جبده بعدها قام وركب سيارته الحبيب ولا جنه سوى شيء:))
ملحوظه "جاري عمل مايلزم للازاله - اترك التشاؤم عنك فهو مضر للصحة ننصحك بالامتناع عنه"
إرسال تعليق